الثقافة والفنون

داخل نطاق السماعات

داخل نطاق السماعات

الحيط ورق

السقف آيل للسقوط

الإيد بترعش م الزعل

ومن الحقيقة البور

رفعت جبينها للسما ساعة شرود

بدأت تقول ….

كان ليه يا سور

تبني لي جتة صغيرة

تقبل تكون مقسومة دايماً لأربعة

في عيون ولد …. ؟

و ان كنت كاتب كل شئ

اشمعنا انا ..

اول ما داست شمس علي ضلي

لاقتني عرض ف بترينات حوا

كل اللي أقوله بيتحسب ضدي

علشان كدة وفرت زعلي ف كلمتين (عادي .. مفيش)

إن كان مؤكد هندفن ..

تسمح  ……..

انا جاية اجرجر شنطتي للقبر

هرمي الحزام الجلد من وسطي

وهسيب هدومي كلها ملكك

لو كنت يوم هترجع الدنيا ..

انا عايزة بس أعرف بنات تانيين

اسود ما فيهم ضل

وبيعشقوا حرفين

(لام.. الف)

بيثوروا بيهم لو دهسهم خوف

من شخص في الشارع ….

عايزة كمان يارب

افضل انا وياك

اتهني بالمشهد ..

ولو الملايكة زعقوا فيا

تفرد سحابة ريشهم الهايش

وتلف بيه الارض علشاني

يمكن يثوروا هما بالحرفين

ف يجيني واحد منهم يهمس

صعبان عليا تبقي وحديكي

ممكن اكونلك في الحقيقة خيال

او شخص عابر من علي جبينك

يديكي وردة كل ما تطلي

و يصلي ليك طول قيام الليل …

اوعاك يارب تسبني من تاني

رجعني ليك ..

او حتي نسيني ..

طب عايزة دنيا تانية غير دية ..

مش عايزة جنة تجيني وانا خايفة

افرد شعوري بين ايدين حبين

ولو نويت خلقي

قولي بس..

ازاي بجد انا هتسأل

وانا جيت هنا بالجبر ؟

طب ليه بتخلق احتمال

ديما في تآويل البشر ؟

مع ان معروف المصير

وليه يارب زرعتلي

فدان من الجنه هنا …

☺ تعليقك يسعدنا.. فشارك به! ☺

ياسمين السبكي

شاعرة مصرية.. صدر لها ديوان شعر عامية بعنوان «شبابيك».. وهي من محافظة بني سويف في صعيد مصر، وحاصلة على بكالوريوس إدارة أعمال، وطالبة دراسات عليا
ياسمين السبكي

Latest posts by ياسمين السبكي (see all)

ياسمين السبكي

شاعرة مصرية.. صدر لها ديوان شعر عامية بعنوان «شبابيك».. وهي من محافظة بني سويف في صعيد مصر، وحاصلة على بكالوريوس إدارة أعمال، وطالبة دراسات عليا

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.