الثقافة والفنون

قصيدة «بابدأ صباحي»

للشاعرة المصرية «ياسمين السبكي»

بابدأ صباحي

من بل ريق في الشمس

من فوق الهدوم

وبوش كرمش مالسهر

لكنه صالح للعمل

من غير ما يتنمرد عليك

او حتي يتهجي بعنيه

لحظة فراق ….

مقطوعة من ألبوم صور

مرسوم طريقه بالرصاص

والضحكة فيه متركبة

وبكام رصيف مكتوب عليه

أحلام سعيدة للايجار

كان ليا جار

أيامه حلوة محندقة

علي قد بيته وعزوته

فارش حصيرة

عمر مكموم بالسكات

كان يغزل الضحكة في شباك الوجع

يصبح ما فيش

صبحت مرة في يوم عليه

ملاقتش جوا الهدمة شيء

ولا حتي شميت الدفا

من برا عتبة قلب بيته ..

يمكن سكون الليل في حبات شقته

رصت خطاوي دبلانين جواه ..

او حد كاره للحياة

عالج سكاته بكلمتين

او محتمل .. بصة عيونه في رسمته

ملاقتش حاجة تمسها

غير هدمة دابت من سنين

ومعاها ضحكة قصيرة

مربوط صداها

في حضن غاب ولا جاش …

هموت واسأل.. هكون ازاي ؟

لو لسه عايشة في كل يوم

بغسل صباحي بضحكتي

وبهد كسرة كل ليل

كان قصد ه انه يهدني ؟

جايز يبان سمر النفوس

او اتمحي من كام محطة

وتتقفل شبابيك

بس الاكيد

وان كنت حبة اغيره

هيموت قصادي حلم كان اخضر

وعدوا جنودوا بالامل ولا طلش

و هجيب لجيبي حزن شخص قديم

رغم إنه مشقوق بالحنين

لكنه رافض يتسرق ..

تنهيها قاعدة كل يوم

كباية فاضية في الغروب

و طيور كتير

بتشق جبروت السما

وبتنحني علشان تخش العش

☺ تعليقك يسعدنا.. فشارك به! ☺

ياسمين السبكي

شاعرة مصرية.. صدر لها ديوان شعر عامية بعنوان «شبابيك».. وهي من محافظة بني سويف في صعيد مصر، وحاصلة على بكالوريوس إدارة أعمال، وطالبة دراسات عليا
ياسمين السبكي

Latest posts by ياسمين السبكي (see all)

ياسمين السبكي

شاعرة مصرية.. صدر لها ديوان شعر عامية بعنوان «شبابيك».. وهي من محافظة بني سويف في صعيد مصر، وحاصلة على بكالوريوس إدارة أعمال، وطالبة دراسات عليا

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.