اخترنا لكمساحة للاختلاف

32سنة حياة!

حبيت مصر جدا.. بس شكله حب من طرف واحد

سمر طارق

متطوعة بمؤسسة تنموية

Latest posts by سمر طارق (see all)

انا سافرت اغلب محافظات مصر…وسافرت بره خمس مرات..غنيت ..ومثلت…ودربت في كورسات ..ودرست في مدارس .. وسُقت ميكروباص ومتوسيكل..دخلت مسرح وسينما وأوبرا..شفت اغلب اثار مصر ومتاحفها الا قليلا…طلعت جبل سانت كاترين…وغصت وشفت الشعاب المرجانية في الغردقة وشرم الشيخ…زرت الصعيد بحلوه ومره… دخلت الجامع وزّرت الكنيسة ومعبد يهودي… مكانش فيه ولا لحظة فى حياتي فيها سكون او موات!

عندي صديق او صديقة واحدة عالاقل في كل محافظة مصرية..وفِي اغلب البلاد العربية..وكذلك كل الأحزاب …نزلت الشارع وعملت قوافل طبية..وحملات لتنشيط السياحة ..شاركت في حملات انتخابية…ربيت كلب وسمك وقطة وقنفد وأبو قردان …وجعفر

اشتغلت و اتطوعت في مجالات كتير في المجتمع المدني الحقوقي والتنموي والخيري ..دخلت مستشفيات ودور ايتام ومصحات ادمان وعشت حاجات كتير..كان عندي مكتبة ضخمة اثرت فيا جدا…حققت احلام كتير بس بعد تعب…اتعرضت لبعض الكبوات الكبيرة بس وقفت من تاني..عرفت كمية ناس بعدد شعر راسي زى ما بيقولوا …سمعت خبرات من العجائز…وضحكت مع امنيات الاطفال وسذاجتهم…بحب اتعلم حاجات جديدة…بحب اسمع تجارب الناس واتفرج علي كل موقف حواليا..بيسعدني اني اكون فرحت حد او سبب انه يبتسم…..وثقت لحظات حلوة ليا ولناس كتير

ظروفي المادية والاجتماعية متوسطة وأقرب للتواضع لكن بعرف افرح نفسي في احيان كتير بأقل الإمكانيات..وبخلي الشغل متعة اخري …اغلب اللي عملته فوق كان في نطاق الشغل!

حبيت مصر جدا..ومسبتش حاجة ممكن اساعد فيها الا وشاركت… بس شكله حب من طرف واحد 😂

بحب الحياة جدا..وبحب شغلي..وبحب اصحابي …وبحب نفسي شوية ساعات وبتعجبني دماغي😂وبحاول يكونلي بصمة مميزة…أثر يسيبلي ذكرى في الدنيا ويتقل موازيني في الآخرة 😊
يعني ال32 سنة اللي هتمهم بكرة اعتقد انهم مراحوش عالارض …عالاقل عملت حاجات بحبها وراضية عنها … حتى لو بدفع تمن بعضها الان

كنت بعمل كل حاجة بقلب اوي ودي حاجة حلوة ووحشة بس مش مهم….
انا الحمد لله مش الملاك المجنح ..وعندي أخطاء كتير ..بس الحمد لله 95 % منها مأذتش حد غيرى…وبحاول اتلافاها…لازلت مجنونة احيانا…وعصبية غالبا..ومتسرعة دائما…وسريعة الغضب جدا جدا…بس بحاول مع نفسي والله!

عشت تجارب كتير وشفت ناس نقية كتير…وجودهم هما وأمي بيقوللي اطمني الدنيا بخير…
عاوزة ربنا يحفظ الناس دى ويسعدهم ويعوضهم خير واشوفهم محقيين كل حاجة اتمنوها قبلي كمان…. وان كل اصحابي يحققوا اللى نفسهم فيه …وان ربنا يقر أعينهم باللى بيحلموا بيه بعد لحظات الامل والرجاء …وان يفك كرب الوطن دة ويسعد ابنائه…
بدعي دايما بدعاء اتعلمته من 4 سنين …وبقوله
امنحنا يا ربنا من السذاجة ما تجعل قلوبنا تستظل بفرحة الأشياء الصغيرة، وليس سذاجة تجعل منا مساغا لكل نفس بطن شرها أو ظهر. وامنحنا من النضج ما نستعين به على فهم الحياة، وليس نضج لا يرى في الحياة إلا قبيح واقعها.

ولا تجعلنا ممن تحبسهم الصورة فيعيشون بين جدران أسوارها الموهومة، وامنحنا من سعة المعنى ولطف الإدراك ما يجعلنا نفرح بخط طفولي عشوائي لرسالة أم تبعثها لأبنها الغائب عن ذلك الانبهار بخطوط منمقة لرسائل غير صادقة.

ولا تجعلنا ممن يخطون مسار حياتهم من اللحظة حتى ثلاثين عاما، فيخططون من سيحبون وماذا سيعملون ومتى سيتوقفون؟ ولا تتركنا نتوه في مسارات الحياة بغير هدى، فنبذل من الجهد فيما نكره ونحن نعرف ما نحب ولا نبذل له شيئًا……

بحلم يا جماعة … بحلم كتير اوى وعمري ما توقفت عن الحلم ومعاه سعي قدر استطاعتي…وعندي أمل ممكن يكفى بلد بسكانها …. بس بيبقى نفسي الامور تمشي زى مانا عاوزة..وبزعل لما دة ميحصلش…

عندي طاقة كبيرة جدا جدا..نفسي اعمل كل حاجة دلوقتى والان…. دايما حاسة اني معنديش وقت كفاية….نفسي اسافر كل الدول…واقرا كل الكتب… واعمل كل الحاجات الحلوة…واتعلم واتعلم واتعلم وافيد الناس اللى اتعلمته….وافرح وافرح الناس معايا…

هكون صادقة واقولكوا اني شايفة اني لسة محققتش حاجة ….
مع ان فيه حبة حاجات نجحت فيها …وحاجات بحاول…وحاجات فشلت فيها او…مش عارفة…ملهاش حل لحد دلوقتى … وفيه ناس خذلتني…وفيه حاجات لما بفتكرها بحس بغصة في حلقي …مكانش المفروض دة كله يحصل!

..بس الدنيا بترخم احيانا …و اعتقد هفضل عنيدة معاها لاخر عمري… وهآخد الريسك فى كل الامور اللى مش هتضر غيري برضه .. وعاوزة لو مت اموت وتراب السكة فى رجلى على رأي ستي ..يعني نموت واحنا بصحتنا ..نموت واحنا بنتحرك منبقاش تقال علي حد …

وبعيدا عن الموت واقبالا على الحياة …
اتمنى ان المحطات الجاية تكون أقل ألما…أو أنا اكون أشد …
ربنا يعوضنا عن اللى فات… ويبارك فى اللى جاي …. ويكون لينا فى الغيب حاجة جميلة تستحق مننا الانتظار

#32_سنة_حياة

☺ تعليقك يسعدنا.. فشارك به! ☺
اظهر المزيد

سمر طارق

متطوعة بمؤسسة تنموية

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.