منوعات

رسالة إلى محبي اللحوم والألبان

انطلاق الحملة القومية لتحصين الحيوانات ضد مرض الحمي القلاعية والوادي المتصدع

الدكتورة سماح نوح

د. سماح مصطفي نوح..رئيس قسم الإرشاد البيطري ومسؤول العلاقات العامة والإعلام بالطب البيطري بالمنوفية، وسكرتير عام لجان المساءلة المجتمعية لبرنامج تكافل وكرامة بالمنوفية

Latest posts by الدكتورة سماح نوح (see all)

المقال دا لكل مربي… لكل صاحب حيوان… لكل انسان بيحب اللحوم والالبان… انتبه

فيه حملة قومية لتحصين الحيوانات ضد مرض الحمي القلاعية والوادي المتصدع علي مستوي الجمهورية تبدأ من يوم السبت القادم22/6 الجاي ولمدة شهر او اكتر في كل الوحدات البيطرية بكل المحافظات بالجمهورية
طبعا دا مرض فيروسي وخطير زي ما حضرتك عارف ومجرب او سامع وشايف قبل كدا .بيجي للحيوانات مشقوقة الظلف او الحافر زي الجاموس والغنم والبقر
اسمه مرض الفم والاظلاف اوFMD.

ليه؟.. لان الفيروس بيأثر جدا علي المنطقتين دول وبيعمل فيهم تقرحات موجعه يعني الفم تلاقيه بالبلدي كدا مهري وكله فقافيق واول ما بتتفجر بيبقي الوجع لا يطاق ..فالمخ يبعت اشارة للغدد اللعابيه فالحيوان يريل ..عشان يلطف الوجع دا فتلاقي الحيوان طول الوقت فاتح بؤه وبيريل بغزارة
وطبعا هتلاقيه سخن ممكن جدا حرارته تعدي ال 40وحركته هتضعف ومش هيعرف ياكل وبالتالي هيخس وبالتالي لبنه هيقل ..ولو حيوان عشر جايز جدا جدا يحصل اجهاض بسبب الحرارة العالية دي
تلاقي التهاب في حافر الحيوان بشكل ممكن جدا بتسبب في خلع الحافر من مكانه عشان كدا اسمها قلاعيه .بتقلع حافر من مكانه .فتلاقي الحيوان رافع رجل ..او مش قادر يدوس وهكذا
انت كصاحب حيوان لازم لازم تجري وتحصن قبل الكارثة ما تحصل ..والحيوان سليم ..ليه
عشان لو الحيوان مريض باي مرض دا بياثر علي فاعليه التحصين لان المناعه بتبقي ضعيفة اصلا فمش هتعمل اساسا اهتمام للتحصين اللي داخل دا غير ان حيوية الحيوان ضعيفة فمش هيستفيد بالتحصين وقتها اصلا ..كإنك ماعملتش حاجة
طيب حصنت
…..لازم تفهم ان التحصين دا بيبدا في شغله بعد ١٥ يوم ..ودي الفترة اللي الجهاز المناعي هيبدا يشتغل ويكون الاجسام المضادة للفيروس للحماية ..يعني لازم تفهم انك لو حصنت ..وبعد كام يوم ظهر اعراض المرض ففيه اسباب كتير زي
ان الفيروس كان موجود بس كان لسة مافيش اي اعراض ..
او انك ما وصلتش جرعه التحصين صح ..وحقنت صح ..حسب نوع اللقاح سواء كان 2 سم او5سم
او حضرتك كسلت تخلي الدكتور …الدكتور مش فلاح جارك او عامل بوحدة يدي التحصين وقررت حضرتك تحصن انت ..فالتحصين باظ لاي سبب ..مثلا سخن منك بسبب الجو ..او مثلا حصنت والحقنه نصها وقع منك او خليت حد يدي الحقن فحقن عضل بدل ما يحقن تحت الجلد
عشان تمشي صح ..يبقي الحقن بالوحدة البيطرية او تحت اشراف الدكتور شخصيا وعلي فكرة الحملة معناها لجان متنقلة يعني الدكتور هيجيلك لحد عندك
طيب لازم تعرف ان لو حصل حالة اصابه فعلا فعلا ..تعزلها فورا بعيد عن الحيوان السليم..لان المرض سريع الانتشار بالتنفس والرياله والبول والاحتكاك
لو الام مريضه اعزل الابن واوعي ترضعه منها او انك تاخد اللبن وتغليه وتبرده عشان تضمن موت الميكروب
انك توقف الحيوان علي ارض مش صلبه يعني ارضة ترابيه لان الحوافر اصلا بايظه وهو مش ناقص
انك تأكله اكل ناعم زي برسيم او ردة مش حطب واكل خشن لان الفم مش ناقص
انك تعالج صح ودا عن طريق الدكتور البيطري مش اي علاج من اي حد
يعني الخلاصة
…حصن صح …تربي صح ….ترتاح من اي وجع دماغ

طيب بالنسبه للانسان

نقول تانى الحمي القلاعية مش بتموت الانسان لو كل لحمه من حيوان مصاب عشان سببين:
اولا / عشان فيه عمليه تيبس دمي بتحصل فاللحمه بعد الدبح ودي نعمه من ربنا بتخلى عضلات اللحمه تفرز حمض اللاكتيك يقتل الفيرس واحنا كمان بنطبخها بدرجات حراراة عاليه ف بتبقى تمام مشكلتها ان قيمتها الغذائيه هتكون اقل بس من اللحمه السليمه
ثانيا / العدوى للانسان بتحصل ان بنى ادم يتعامل مع حيوان مريضه بشكل مباشر او عن طريق اللبن فالحلب مثلا
ثالثا / خدو بالكم الفيرس بينزل فاللبن اثناء الحلب عشان كده ممكن الفيرس يتنقل من اللبن قبل ماتغليه ف الافضل اللبن المبستر الفترة دي
والمرض اللى شبهه فالانسان بسبب فيرس كوكساكي A بيعمل حويصلات فيها صديد في الايد والرجل والفم فللانسان مالوش علاقه باللي بيعمله فيرس الحمى القلاعيه اساسا ده فيرس وده فيرس
بس الحمي القلاعية من ضمن الأمراض المشتركة وبتعمل بردو التهابات باليد والفم احيانا ولكن علي خفيف
اهم شي اشتري لحوم صح مختومة ومضمونه

 

☺ تعليقك يسعدنا.. فشارك به! ☺

اظهر المزيد

الدكتورة سماح نوح

د. سماح مصطفي نوح..رئيس قسم الإرشاد البيطري ومسؤول العلاقات العامة والإعلام بالطب البيطري بالمنوفية، وسكرتير عام لجان المساءلة المجتمعية لبرنامج تكافل وكرامة بالمنوفية

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.